Овогодишната Google I/O конференција понуди многу новитети, а меѓу поважните, покрај Android 2.2 и новиот видео формат за веб, се најде Google TV. Станува збор за отворена платформа која ја комбинира интернет мрежата и телевизијата. Беше претставен set-top-box наречен Google TV, кој за компанијата го изработува Logitech, еден од партнерите на Google во овој проект, меѓу кои се вбројуваат и Sony, Intel, Best Buy, DISH Networks и Adobe. Уредот хардверски е базиран на Intel процесор Atom CE4100, а софтверската подлога е Android. Корисниците ќе можат да ги следат стандардните телевизиски програми, но ќе можат да сурфаат на интернет и да гледаат видео-стриминг преку интегрираниот прелистувач Chrome со поддршка за Flash. Освен овие можности, Google TV ќе го поддржува Android Market-от. Интегриран е и систем за пребарување, поддршка за безжична тастатура и управувачите Harmony од Logitech, како и можноста за управување преку Android базиран паметен телефон. Во план е и посебен SDK за развивачите, кој донесува дополнителни API функции за постоечкиот Android SDK, со цел програмерите да можат да развиваат апликации и содржини за Google TV. Со оглед на тоа дека станува збор за платформа, интеграција на Google TV во своите уреди најавуваат и останатите партнери - Sony со своите телевизори и Blu-ray плеери, Logitech со новите set-top-box-ови, другите со нови услуги. Уредите би требало да бидат достапни на пазарот до крајот на оваа година.